الأم : ها ((كوماري)) لبستي اليهال ملابس القرقيعان ؟
كوماري : ماما ركوده ما يبي يلبس قول دراءة كزز ، و أزوز ما يبي قوم .
الأم : شلون ما تبي تلبس اشحلوها بدلة القرقيعان شاريتها لها ب 50 دينار و ترترها شزينه يبورق ، يلا لبسيها بسرعة لا نتأخر على بيت بابا عود .
عزوز عزوزو و صمخ !!
عبد العزيز (8 سنوات ) : ها ماما قاعد ألعب بليستيشن .
الأم : بسك من هالبليستيشن حاضنها ليل نهار ، يلا قوم ألبسك ملابس القرقيعان .
عبد العزيز : ماما ليش لازم نلبس جذي آنا مابي ما أحب الدشداشة .
الأم : يلا عاد قوم كله يوم واحد تلبسونهم فيه تاخذون قرقيعانكم و خلاص ، ها رغوده يما خلصتي ؟
رغد (9 سنوات ) : ماما ما أبي ألبس بخنق يقزز ويهي .
الأم : أف لبسيه هناك بس يلا خلصوني ، كوماري يلا شيلي صناديق مال قرقيعان .
شالت كوماري المسكينة الصندوقين ملوت القرقيعان اللي امسويتهم الأم واحد باسم رغد و واحد باسم عبد العزيز و حطتهم بالسياره ، طبعا القرقيعان اللي مسويته أم عزوز ما يدور فيه الجكليت و لا الملبس و لا المخلط ...
-------------------------------------------
اليد العود : إي ليش عاد ؟
الأم : يبا الله يهداك هالأشياء يقصون فيها اليهال توقف إبلاعيمهم ، و بعدين ألحين إطلعت شغلات يديده أحلى و أطعم .
اليد العود : الله يرحم أيام أول يوم كان القرقيعان صج قرقيعان .
الأم : يلا يبا العود عن إذنك بروح أقعد مع الحريم .
-------------------------------------------
راحت الأم مع إعيالها حق جمعة الحريم و عقب ما سلموا على كل إلي بالصاله و صلت حق إختها خلود ...
خلود : هلا بوخيتي عيوش شهالكشخة شهالزين .
الأم : هلا بأختي حبيبتي ، ها شرايج بدراعتي مو عجيبة ؟ فريت المحلات فر على ما لقيتها ، بس بذمتج مو تسوى سعرها شاريتها ب 600 دينار .
خلود : ها .. إي إي تسوى ، (تدش كوماري و تحط الصناديق على طاولة القرقيعان مع باجي السلال) يا وخيتي لا جان كلفتي على روحج مو ثقيلة عليج هالصناديق .
الأم : ويه خلود عادي شدعوه آنا شايلتهم و بعدين قلت ما أبي أخلي شي بخاطري أو بخاطر إعيالي قعدنه نخم من هالجمعيات من آخر شعبان لي أمس .
خلود : إي الله يعطيج العافية ، وي يحلوهم رغوده و عزوز بملابس القرقيعان جان صورتيهم .
الأم : إي تونا كنا رايحين المصور صورهم روووعة بس ما تخلص اليوم أخرنا علفاظي ، قلت بصورهم لمن يقرقعون .
-------------------------------------------
تدخل يدة اليهال علشان يبدى القرقيعان ، نادتهم واحد واحد من مكاناتهم وعليه يستحون ، لين جمعتهم كلهم حواليها ...
يلا يما شفيكم ساكتين قرقعوا ؟!
الأم : يما الله يهداج يستحون و بعدين أهما ما يبيون طاري نشيدة القرقيعان إلا من سنة لي سنة تلقينهم نسوا ، شرايج انشغل المسجلة و انتي توزعين القرقيعان .
اليده العوده : لا ما نبي المسجلة آنا أقول و هم يردون وراي يلا يهالو ....
قرقيعان و قرقيعان بيت قصير و رميضان
عادت عليكم صيام كل سنه و كل عام
يا الله تسلم ولدهم يا الله تخليه لأمه
عسى البقعة ما تخمه و لا توازي على أمه
عطونا الله يعطيكم بيت مكة يوديكم
يا مكة يا معمورة يا أم السلاسل و الذهب يا نورة
اليهال ردوا وراها أول سطرين و بعدين خنسوا تعلقت عيونهم على جياس القرقيعان ، توها اليده العودة بتمد إيدها على قرقيعان عوشوه أم عبد العزيز جان تنطلها و قالت ...
عايشه: يما يما لحظة لحظة هذا القسم اللي خذيتي منه مو حق الصغار حق الكبار
طلعت فوق راس اليده مليون علامة استفهام جان ترد بدهشة كبيرة
اليده العودة : حق الكبار !! آنا خابرة الحلاو و الكاكاو حق البزران يسلونهم فيه مو حقكم انتو كل وحده كبر الهقل قاعده و قوقشها تحتها ؟!
عايشه : يما شفيج ألحين كله جذي قرقيعان حق الصغار و قرقيعان حق الكبار ، فشله نعطي اليهال ما نعطي أمهاتهم يزعلون .
اليده العوده : ويييه زعل بو يعل ، أهوو بس وخري وخري انبح صوتي وآنا أغني و ألم بهاليهال، طلعتو انتو اليهال خل أروح أطالع مسلسلي وايد أبركلي و انتو كل وحده توزع قرقيعانها على مشتهاها .---------------------------------------------
و انسحبت اليده من القرقيعان ، و قامت كل وحده توزع قرقيعانها حق اليهال و أمهات اليهال ، طبعا الدي جي مشغل ، و كل وحده تتشيحط بكشختها و بقرقيعانها ، اليهال مستانسين بجياس الحلاو و لاهين فيها ، الخدامات يغسلون صحون الفطور و الغبقة اللي مو راضية تخلص ، و ريايلهم إلي طالع و إلي ثقل راسه و نام عقب الفطور و اللي قاعد على التلفزيون كل واحد ينطر مرته علما ترد من بيت أهلها بطريقته الخاصة .
و عساكم تعودونه كل سنه و تصومونه .... :)
صنع القناع و تشكيله من الطين كان من الأشياء اللي استصعبت علي ، كنت أعيش حالة مأساوية و آنا أسويه ، بس حطيت في بالي إني مستحيل أستسلم ، دكتورنا كان يقولنا عادي إذا تجربتج الأولى افشلت حاولي مره ثانية و عاشرة لين تنجحين .
