معرضي المصغر

بسم الله الرحمن الرحيم

اللهم صلي على محمد و آل محمد

بعد غياب طويل عن عالم التدوين بسبب انشغالي بالكورس الصيفي قررت أن يكون هذا الموضوع عن ما أنجزته خلال الكورس الصيفي في مقرر التربية الفنية و مقرر وسائل اتصال تعليمية ، كان الكورس حيل مزحوم و وايد فيه شغل عملي فما كان عندي وقت كلش إني أدخل على النت ، قلت أسويلي معرض مصغر على مدونتي مثل اللي كنا نسويه بالفنية و أشارككم إنجازاتي ، و ألحين أخليكم مع الصور : )

أولا : مقرر وسائل اتصال تعليمية :

- المشروع الاول : الملصق التعليمي :

بما أن تخصصي رياض أطفال اخترت يكون موضوع الملصق عن الفواكه ، و كان هذا المشروع أهو أسهل واحد من بين مشاريع هالمادة .

- المشروع الثاني : المجسم :

تقريبا كان أصعب شي سويته هالكورس ، تعبت عليه و خذه مني وايد وقت ، طبعا الدكتور خيرنا بين اللوحة الوبرية -أسهل و تشبه شغل الملصق- و المجسم بس آنا قلت بتعلم أسوي مجسم بما أن مواد العملي شوية عندنا بالكلية ، كنت أحاول أستفيد لأقصى درجة من المقرر ، المجسم عن وسائل المواصلات الحديثة .

- المشروع الثالث : الشفيفات :

كان علينا إن نسوي شفيفة تراكمية و شفيفة أحادية ، التراكمية سويتها عن الأشكال الثانوية ، و الأحادية عن المهن ، و الشغل عليها ما كان حيل صعب .

هالمادة خذيتها عند دكتور محمد القادري كان عجيب صج استفدنا منه وايد ، كنا نتعلم منه و احنا نضحك من كثر ما دمه خفيف و قلبه طيب ، تعبت بهالمقرر بس حيل استفدت من المادة ، و أتمنى يطرحون مواد عملية أكثر في كلية التربية علشان نستفيد منها حق الميداني و الشغل بالمستقبل .

ثانيا : مقرر التربية الفنية :

- المشروع الأول : البطاقة الابتكارية :

كان المطلوب منا إن نسوي بطاقة شكلها غير تقليدي و مناسبتها و الكلام اللي داخلها هم غير تقليدي و كان هذا انتاجي ...

صنع القناع و تشكيله من الطين كان من الأشياء اللي استصعبت علي ، كنت أعيش حالة مأساوية و آنا أسويه ، بس حطيت في بالي إني مستحيل أستسلم ، دكتورنا كان يقولنا عادي إذا تجربتج الأولى افشلت حاولي مره ثانية و عاشرة لين تنجحين .

- المشروع الثاني : ورشة الطفل الفنية :

المطلوب منا إن نسوي نشاطين فنيين للأطفال كل نشاط يتبع خبرة معينة من خبرات الروضة ، و لازم يكون في تنوع بالخامات و الألوان المتوفرة للطفل ، و أيضا طلب منا نسوي فكرة للعرض أو شي يساعدنا إن نعرض إنتاجات الأطفال الفنية بعد ما يخلصون ، و شرط تكون الأنشطة غير تقليدية و تعطي مجال للأطفال إن ينوعون بالشكل و اللون و الخامات يعني ما يتقيدون بنموذج معين ، و هاذي صورة فكرتي للعرض و العناصر اللي داخلها هي عبارة عن الانتاجات .

- المشروع الثالث : عمل فني ابتكاري من علب الكلينكس :

نستخدم فيه من 3 إلى 6 علب كلينكس من أي حجم ، تكون إهي الخامة الأساسية اللي نشتغل عليها و ممكن نضيف لها أشياء ثانية للتزيين ، كانت فكرتي إني أسوي أبجورة ، لمن تشوفون الصورة يمكن تسئلون وين علب الكلينكس ؟! آنا قصصت زوايا علبة الكلينكس من الحجم العادي و ثبتها على القاعدة اللي تطلع الضوا علشان يكون شكل العلب ماشي مع الشكل العام اللي بسويه .

- بعض الواجبات في التربية الفنية :

( واجب اللون المفضل )

( العمل الفني الحر )

مقرر تربية فنية أخذته عند دكتور عادل النجار هم خوش دكتور و تعلمنا منه وايد أفكار غريبة و أهم شي كان يركز عليه إن نحاول نبتكر نطلع من المألوف و ننتج أعمال فيها نسبة كبيرة من التلقائية .

ملاحظة : تر كل هالأشياء اهي أشياء أول مرة أجرب أسويها ما كانت عندي أي فكرة عنها تلوين الفلين ، صنع القناع بطين الصلصال و تلوينه و باجي الشغلات ، يعني كلنا نقدر نتعلم و نتقن الشغلات و على قولة دكتورنا محمد :(مدام آنا قدرت أسويه عيل انتو تقدرون تسوونه) .

بالإضافة للمهارات العملية اللي تعلمتها بهالكورس تعزز وايد عندي الجانب الاجتماعي و توسعت علاقاتي بالناس بشكل حيل كبير فرق عن أول ، وناسة قمت أحس صج انه ما باقيلي شي و أتخرج لأن اللي على وجه تخرج اقومون يعرفون أغلب زملاءهم في الدراسة من نفس دفعتهم .

---------------------------------------------------------------------------

عذروني إذا طولت عليكم بالبوست ، أتمنى يكون معرضي عجبكم

و بس سلامتكم :)